寫ti頭前

有唐山公，無唐山媽

時到時擔當，無米煮蕃薯khou湯

有毛的食kah棕簑，無毛的食kah稱錘

人gau，天做對頭

Amkun生瘤--tu-tioh

仙拼仙，拼死猴齊天

Beh好龜peh壁，beh敗水pang山

衙門八字開，無錢毋免來

蔡tu蔡，神主牌仔kong kong破

Ka-ti栽 1 chang，khah嬴看別人

辜顯榮比顏智，破尿壺比玉器

第一憨，種甘蔗乎會社磅

做雞tioh chheng，做人tioh ai peng

乞食趕廟公

愛拼才會贏

1624年荷蘭人ui安平登陸，佔領台灣建立第一個外來政權；

1662年鄭成功趕走何蘭人，ti台灣建立第一個漢人外來政權，將台灣當作反清復明基地；

1684年滿清結束鄭氏王朝，接受施琅「為防台而治台」的建議，強行將台灣納入中國的版圖；

1895年馬關條約簽訂，中國宣佈「永久」放棄對台灣的主權，soa來日本入主台灣；

1945年二次大戰結束，日本戰敗，放棄對台灣的主權；世界各殖民地基於「民族自決」 kap「主權屬當地人民」而紛紛獨立；盟軍暫時乎「中國國民黨」佔領台灣，等待日後處理；

1949年，中國國民黨hong趕出中國，因為無路thang走，只好藉口「台灣自古是中國不可分割的一部份」，ui「暫時的佔領」想beh變作「永久」的佔領，做為in「反功大陸」的基地；

台灣人boe-hu基於「台灣主權在台灣人民」而宣佈獨立建國便再度落入外來政權手頭；

1995年，tu-ho台灣脫離中國、思考獨立自主100年；1995將是台灣無分「原住民」、「Hakka」、「Holo」iah是「新住民」(原外省人)，合力迎接並決定「出頭天」的日子！

Chit 400年來，屬於台灣人民的歷史因為種種的政治因素一再hong扭曲、抹殺。咱chit-pai的主題是台灣史，咱希望借tioh台灣俗語kap歷史的結合，提供大家一個新的台灣史觀，重新認識台灣人400年來的反抗史...

Ti kui千年前，原住民族已經ti台灣chit塊土地頂留落in的腳跡...。

In靠phah-獵、掠魚維生，分佈ti台灣本島kap紅頭嶼(蘭嶼)。In to是馬來語系，印度尼西亞文化群（Austronesian）的原住民，也就是清朝眼中的「熟番」kap「生番」，現此時的「平埔族」kap「高山族」；in long是咱的祖先之一。

現在咱講的九族文化村其實是指「高山族」的九大族；平埔族原有(粗分)十大族，後來因為ham漢人通婚等漸漸 “融合” ti「漢人--平埔」的血統中間。俗語講：「有唐山公，無唐山媽」，to是說明當初渡海來台的漢人真che long是羅漢腳仔，in不管「另有目的」iah是「單純」，只好娶當地的cha-bou(平埔族的女性)做牽手，因此你我加加減減long流有原住民的血液...。

Ti歐洲各國當中，上早進軍亞細亞的算是葡萄牙，ti 15世紀末已經出現ti南海上...。

1557年，葡萄牙船員駛過黑水溝(台灣海峽)的時，看tioh一粒真青翠真sui的大海島，擋boe-tiau to hoah「IIha！For-mosa！」，in的意思是講：「哇！chiah nih sui的島嶼！」

隨tioh葡萄牙行船人的o-lo聲，台灣漸漸踏入世界的台仔頂。Ma ui chit sichun開始，台灣人準備展開一連串反抗殖民統治的奮鬥。有人講：「蕃薯毋驚落土爛，只求枝葉代代湠」，正說明了咱台灣人反殖民、反外來統治的打拼精神！

17世紀明末的sichun，大陸地兵荒馬亂，無好賺食。俗語講：「Bong賺khah be san」，ti大陸地福建閩南一帶的漢人因為當地生活困苦，to想講無來對面的「台灣」開墾看mai，to抱tioh「時到時擔當，無米chiah煮蕃薯khou湯」試看mai的心情來到台灣...。

但是beh來台灣毋是講beh來to來neh！大陸ham台灣之間有一條黑水溝(台灣海峽)，風湧大、水koh chhoah-流，真che人long ti中途to乎海水淹死。所以有人講，beh去台灣有可能半途就「埋冤」...。

到底「台灣」的地名是anchoaN來的呢？比較khah會信=chit-e是台南安平附近有toa平埔siraya族的taiouan社，後來外來者to kiosi chit-e所在號做Taiouan，in to ka號做「台員」。所以當初「台員」是指安平一帶nia，後來chiah一直擴大到全島long號做「台員」，至於「台灣」chit-e寫法一直到清初康熙時期chiah確定落來。

Chit-e時期，黑水溝m-na chhoah-流，甚至不時to有海賊ti hia loa-loa-so。其中有名的是以顏思齊為si-toa的chit陣，其中伊有1個sise號做鄭芝龍，伊to是鄭成功的lau-pe。In將台南附近做為「海賊巢」，一方面控制台灣海峽，一方面開拓台南以北的沿海地帶。所以有人講，咱long是海賊的後代，雖然無一定long是anne，但是俗語講：「歹竹會出好筍」；to算咱的祖先long是海賊，ma無代表咱to無出脫！咱kang-khoan創造了所謂的「經濟奇蹟」...。

1603年，ti荷蘭佔領台灣chin-cheng，原本想beh佔領澎湖，soah乎明朝phah退；1622年荷蘭再度前來，結果乎伊佔tioh澎湖，毋過2冬後koh乎明朝打退。而且雙方協定講荷蘭退出澎湖，至於荷蘭佔領台灣是in-tau的代誌，明朝不便表示意見...。以明朝e立場來看，台灣不過是化外之地，hong佔領干伊啥物代誌？但是澎湖to無-kang a，自元朝以來to ti伊的勢力範圍之下，對伊來講，「澎湖」chiah是伊 “不可分割” 的部分！

1624年，荷蘭登陸台南安平，正式佔領台灣。俗語講：「橫柴gia入灶」，外來統治者開始對台灣進行經濟搶奪。所有外來統治者的特色long是搶奪殖民地的財富，了後送tng去in的母國。俗語講：「有毛的食kah棕簑，無毛的食kah稱錘」，etang說明外來統治者的貪心。根據統計，荷蘭ti台灣所賺的，ti亞洲各地的商館kantaN輸日本，佔第二名！

荷蘭ti台灣一方面進行殖民掠奪，一方面koh扮演傳教士的角色。In幫原住民創造羅馬字(新港文)，使得in有文字thang記載，而且ui印度進口百外隻的黃牛來台灣，台灣ui hit-cham開始chiah有犁田的牛...。當然這一切long是為tioh提高生產力，奪取khah-che經濟利益！

Kang一時期，台灣的北部是由西班牙人所佔領，毋過後來to乎荷蘭人趕走去a...。

荷蘭時期，tu開始真歡迎大陸移民來台，毋過到尾仔in感覺漢人真歹管理真無聽話，to加強管制ham增稅...。俗語講：「豆油借你un，soah ham ti-a也搶去」，漢移民對於荷蘭人chit-chiong酷刑的行為真看be過，lou-boe ti 1652年發生郭懷一的反抗運動，這ma是台灣史上頭-chit-chan的反抗運動。

咱講郭懷一是to chit kak-si neh？原來伊khah早是鄭芝龍的sise，鄭芝龍「西瓜oa大-peng，欠錢毋愛還」接受明朝的招撫了(後來明朝勢面bai，koh投降清朝)，伊ham另外一個sise號做何斌=e，繼續留toa台灣開墾。眾人擁護下，選in 2個做「甲螺」(首領)；荷蘭人實施王田制了，koh任命in做大結首...。

咱講荷蘭佔領台灣的第28年(1652年)，伊利用一個落雨的暗瞑召集眾人講：「台灣是咱打拼出來的，紅毛仔竟然乞食趕廟公，咱不如ham伊戰，戰若贏，台灣就是咱的...。」

俗語講：「人gau，天做對頭」，koh講：「千算萬算，毋值天一劃」；想boe到在場有2個「抓耙仔」，其中一個koh是郭懷一的小弟，in 2個驚出代誌，to去密告。

會後大家發現有「抓耙仔」，chai-iaN代誌bai a，to hiong-hiong決定隔kang透早隨進攻。隔kang，天iau boe光，郭懷一率領1萬6千人攻下普羅民遮城，一時聲勢真大。毋過後來荷蘭人動員2千名的高山族(原住民)士兵，臨時組成的萬goa人 “軍隊” soah phah輸，si-ke逃走。Ti chit-kai被殺害的，包括cha-pou、cha-bou、老人囡仔，差不多有萬goa人...。郭懷一ma ti chit場的戰役lai-te khiau去。

人講：「千變萬化，毋值得天造化」。Chit-kai e反抗運動無kah 10 kang to hong鎮壓，除了使台灣人口減少真che之外，也使得對岸想beh移民的人真躊躇...。

咱前回有講tioh郭懷一反抗運動，ti hit-e時期鄭成功當teh中國福建一帶ham清兵車拼；ti 1658年伊用所有的兵力23萬人北上攻金陵(南京)，結果落衰phah輸，家伙去一半。了後伊開始考慮進攻台灣，想beh佔領台灣做為「反攻大陸」的基地...。

咱前回ma有講tioh鄭芝龍的另外一個sise --何斌。伊聽tioh風聲講鄭成功有意思phah台灣，to紮tioh海圖到廈門乎鄭成功，企圖說服鄭成功進兵。鄭的部下各有無-kang的看法，經過一番的爭論，鄭成功chiah決定征台...。

1661年4月，鄭成功率領2萬5千名士兵，按何斌所紮的地圖所指，利用海水溢起來的sichun，避開荷蘭的砲台，ui鹿耳門水路攻入來...。荷蘭人想boe到有chit步，soah na phah na輸，到lou-boe只好投降。

通常咱一提tioh鄭成功to會想tioh「民族英雄」chit-e名詞，事實kam anne？伊是khia ti啥物觀點來看chit件代誌leh？因為鄭芝龍bat ti台灣停留過(1624-1628)所以証明ti鄭成功攻台chin-cheng台灣已經屬於中國(明朝)？若anne，荷蘭人ti台灣有38年(1624-1662)，是毋是更加有資格講台灣是in e「先人先物」？甚至原住民是毋是更加esai講kui千年來in to是chit塊土地的主人？事實上，台灣應該是所有開墾台灣有功的人的！

俗語講：「Amkun生瘤--tu-tioh」，鄭成功ti大陸的軍事無順利，尾手不得以只好進攻台灣作為「復興基地」；為tioh合理化出兵台灣，伊當然講：「此地乃我先人故物，今所有珍寶聽而載歸，地乃還我，兵始罷。」(摘自「台灣府志」)。Ti 1662年鄭、荷簽訂和約，是khia ti轉讓者ham承讓者的立場，而毋是收復者ham被收復者。荷蘭人esai紮走所有私有財產、倒tng去巴達維亞的糧食、彈藥，而且奏樂上船來離開...。

鄭成功乎咱的意義不過是soa荷蘭了，第一個漢人建立的有系統、有組織的漢人政權！Ti chit-e sichun iau無法度講「台灣自古屬於中國」，正確的講法應該是施琅phah敗鄭克塽，台灣chiah hong強納入清朝的版圖！詳細咱後回會koh分析。

鄭成功phah敗荷蘭佔領台灣了，將台灣改稱「東都」，無到半冬，鄭成功to過身，由囝鄭經繼承...。

Tu開始，鄭經iau佔有金門、廈門兩個所在kap台灣，但是後來遭受清朝ham荷蘭的合攻，只好放棄金門kap廈門，決心退回台灣經營。伊將「東都」改做「東寧」，自稱「東寧國主」，hit當時ham伊做sengli e西洋人long稱伊「King of Taywan」(台灣國王)。

真明顯，hit當時已經是「台灣獨立」，但是hit當時的獨立kap現代主張的「獨立」kap「統一」long無saN kang。正港的「台獨」是「主權獨立」以及「國格獨立」而且ham對方和平相處變成好厝邊chiah tioh。但是東寧王朝雖然主權獨立毋過iau不時siau-想「反攻大陸」，ham清朝之間並無友好往來...。

東寧王朝對台灣的經營主要有三方面：第一，獎勵土地開墾，實施屯田制；thang好供應軍隊的食穿。第二，設學校，實施儒家教育；thang好維持統治機構。第三，ham清朝以外的國家貿易，發展經濟；thang好突破清朝的「禁海令」、「遷界令」的經濟封鎖。

俗語講：「仙拼仙，拼死猴齊天」。雖然鄭經ti台灣建立東寧王朝，但是「反攻大陸」的野心並無放棄，ti台灣的一切經營目地iau是「反清復明」。而清朝為tioh對付東寧王朝所實施的鐵脕政策也造成中國大陸沿海一帶人民生活困苦。兩方相戰，食虧的永遠是人民！歷史ka咱講，干願和平相處，做好厝邊「chit-peng一家代，公媽隨人chhai」chiah是正途！

咱講清朝ham鄭氏王朝之間ma bat和談kui-a-pai，甚至1679年清朝提出和談條件，意思是從此鄭氏王朝ham朝鮮、日本kang-khoan，etang tiam台灣建立ka-ti的國家，只要liong-peng和平相處mai koh相爭...。(詳見平南將軍貝子賴答致鄭經之諭文)但是堅持「反攻大陸」的鄭經那有可能答應，所以和談一直無結果。

因為施琅一直提議攻打鄭氏，後來清朝下決心beh提下台灣。為tioh預防清軍的進攻，鄭軍ma嚴防戒備，但是軍隊士氣並無好，而且為tioh軍糧ai課重稅，造成百姓困苦。1683年，施琅領軍攻下澎湖，鄭克塽看時勢已去ma無心koh戰，只好無條件投降，於是無流血to佔領台灣。

俗語講：「Beh好龜peh壁，beh敗水pang山」koh講「一代興，二代賢，三代lok-lian」。鄭氏王朝lou-boe拼be過清朝並毌是因為「小國」拼be過「大國」，主要因為鄭氏內部對「大陸政策」有紛歧；而且治台目的主要是提供反攻的軍需，並毌是以人民福祉為考量，無法度得tioh全民支持；koh來因為軍民並無形成命運共同體，對土地感情iau無夠，無法度抵抗外來侵略者。

雖然清朝phah敗鄭克塽，但是伊認為台灣kantaN是「放雞屎=e有，生雞卵=e無」，想beh “放棄” 台灣，將台灣島上的移民long soa tng去中國，chhun澎湖留落來做軍事用地。施琅chai-iaN了力勸m-thang，ai將台灣 “留” 落來，免除後患。清廷想想leh ma有理，chiah將台灣列入版圖。

雖然清廷將台灣列入版圖，但是伊的心態是為tioh防台而治台，驚台灣人koh起來「造反」、「反清」，所以設「三禁」，限制大陸人民移民台灣；其中有一條是禁止廣東一帶移民台灣，這是造成「客家」移民比「Holo」移民慢koh chio的原因之一。

咱前回有講tioh清朝佔領台灣(1683年)，伊是為tioh防台而治台，所以一開始to設「三禁」來嚴格限制移民台灣，一直到1760年才解除。

清廷對台灣的政策是「防反」的政策，也to是無ng-bang etang ui台灣提tioh好處，kantaN台灣mai「造反」mai「反清」to好。所以俗語講：「3年官2年滿」，表示來台灣做官的任期3冬to boe-thau，to想beh趕緊調tng去中國內地；而且駐台的軍隊3年to ai輪調1 pai，而且不淮台灣人做兵，因為驚台灣人有武器了會「反清」；ai防止權力台灣化。俗語koh講：「衙門八字開，無錢毋免來」、「做官清廉，食飯攪鹽」，顯示hit當時做官的因為boe爽hong調來台灣，所以會貪to盡量貪，油水撈撈leh to beh tng去大陸。

俗語講：「三年一小反，五年一大亂」，因為食錢官的oai-ko，致使清廷統治的200 goa-冬中間，發生無數的「造反」。真che thng-赤腳的做穡人因為chih-chan boe-tiau封建官僚的腐敗，所以tiaN-tiaN起來反清，像朱一貴、林爽文等等，但是清廷long無檢討是anchoaN會來「反清」？Long將chia=e人認定為土匪、強盜來看待，所以便若有「造反」事件，清廷to chhoe一寡人來鬥-saN-kang “平亂” ；如果造反的是Holo-lang to chhoe客人來平亂，如果是客人ham Holo-lang聯手，to chhoe原住民來平亂，若平亂有功to封in做「義民」，這是「義民」的由來，ma是滿清「弄狗相咬」調撥離間的政策。

至於讀冊人因為真chio，而且大部份long是希望etang考tiau做官，所以若毋是khia ti滿清的立場to是「khia高山，看馬sio踼」對代誌發生long無關心，所以大部份的「造反」事件long是thng-赤腳的giah頭旗。

咱有講tioh，雖然清廷限制移民而且官府的食錢官真oai-ko，但是想beh偷渡移民台灣的人kang-khoan真che，尤其是18世紀末到19世紀初是漢人移民的siong高潮。荷蘭時代到清朝佔領初期，台灣的移民ham開墾的土地比起來iau算真chio；但是康熙中期了後，人lu來lu che，土地ham水源的相搶to lu來lu激烈。

主要long是Hakka-ngin(客人)ham Holo-lang之間的爭奪，但是漳州幫ham泉州幫中間的摩擦ma boe-chio，甚至有時原住民ma會chhap入來。所以俗語講：「蔡tu蔡，神主牌仔kong kong破」、「陳tu陳，giah刀仔sio殘」，顯示雖然漳州幫ham泉州幫long是Holo-lang，但是因為利害關係無-kang ma會giah刀仔sio殘。

假使in之間的衝突變大，清廷驚in變為「反清」造反，to會招募「義民」來平亂(如前回所講)。所以「義民」的功用在於消平「械鬥」kap任何「反清」的活動。像「嘉義」原名「諸羅」，但是因為幫助清廷消平「林爽文事件」所以賜名「嘉義」。

分析清朝統治台灣200 goa冬，會發生無數的「械鬥」、「反清」的原因主要有：一、清廷自本to無重視台灣，是為「防台而治台」，而且食錢官滿滿是，oai-ko不斷。

三、經濟上、意識上，iau boe擴大kah全台灣， “生命共同體” iau boe建立完全。雖然「械鬥」不斷，但chit-e時期ma同時進行tioh本地化。Iah to是tiam chia娶bou生囝、建立家園將台灣當做是故鄉，無beh koh tng去大陸內地a；所以俗語講：「唐山客，對半說」，意思是講ui唐山(中國)來的sengli人khah無實在，tiaN-tiaN出價to beh唬人，顯示hit當時已經會區別本地人(台灣人) kap內地人(大陸人)；海島文化ma ti chit-e時期慢慢形成。

Chit-e情形一直到1895年日本佔領台灣，一方面因為第三者的侵略，一方面因為封建社會的崩潰行向近代化，致使「械鬥」無koh發生，本地人意識演變為「台灣人」意識；ma因為日本的統治，台灣的經濟、政治、文化種種自成一體，ham中國lu行lu遠，終於演變為「台灣民族」(Nation)的形成！

1871年發生牡丹社事件，iah to是54 e琉球人因為風颱而流kah台灣南部，soah乎南部的原住民殺害；事後日本藉此向清朝抗議，清朝表示台灣「生蕃」為化外之地，beh thai beh刮隨在你。於是日本ti 1874年發動征台之役，派軍來台 “修理” 牡丹社的原住民...。

後來雙方簽定條款：清朝承認琉球為日本的領土koh賠50萬兩chiah soah了事。因為kang時間前後ma發生真che件外國人siau-想台灣的代誌，征台之役了清朝chiah發現台灣的重要，於是chiah派沈葆禎來革新行政，並有劉銘傳等人建設台灣的動作出現，甚至ti 1887年將台灣升做「省」...。但是chia短短20年的洋務運動ham大陸比起來，結果kang-khoan是失敗的，甚至ham後來日本統治的50冬比起來，esai講台灣的近代化(資本主義化)基礎是ti日據時代建立起來的！

俗語講：「12月食菜頭，6月chiah tng sau」，中國清朝ham日本發生甲午戰爭，清朝戰輸soah將遠離戰場2000里的台灣 “割” 乎日本(1895年)，甚至割chin-cheng iau koh講台灣是「男無情，女無義，鳥不語，花不香」！

馬關條約巳經表示「永遠割讓」台灣，iah to是中國已經放棄對台灣的主權囉！日本ti二次大戰戰後所訂的任何和約ma一再表示「放棄」對台灣的主權，並無講台灣應該是siang e領土或版圖！這是台灣地位未定論的由來。

若照聯合國的憲章kap國際法來看，台灣人民有權自決，iah to是有主張beh獨立自主或者乎中國管的權利！二次戰後真che殖民地long紛紛獨立包括韓國、菲律賓、印度、越南等近百個國家long是因為自決而出頭天的！

咱話koh tng來講1895年李鴻章ham伊藤博文簽訂馬關條約了有一部份的人開始蘊釀成立「台灣民主國」，包括台灣尾任巡撫唐景崧kap丘逢甲等人。但是in所提倡的「台灣民主國」ham chit-mai所beh建立的有主權的台灣國無-saN-kang！

唐景崧in所提倡的台灣國，年號「永清」，面對清廷iau是像獨立宣言lai-te所寫的「恭奉正朔，遙做屏蕃」；意思是，台灣雖然獨立，是真不得以的，kang-khoan干願做tioh中國的「下腳手人」。莫怪，當日軍進攻到台灣，情勢一亂，chia=e「頭人」to紛紛「阿婆仔lang-kang」包服仔khoan khoan leh趕緊走tng去中國，chhun正港的台灣人留tiam台灣抵抗日軍...。

俗語講：「牛chai死，m-chai走，豬chai走，m-chai死」，台灣牛雖然chai-iaN大禍臨頭，日軍beh來a，但是伊kang-khoan beh留ti chit塊土地奮鬥；50冬經過a，ham中國的內亂比較，到底是禍iah是福？咱au-pai會koh詳細討論。

總之，俗語teh講：「Ka-ti栽 1 chang，khah贏看別人」，惟有台灣-chang發kah真om真大葩chiah是台灣人的幸福！

俗語講：「入虎口，to oh-au」，當台灣割乎日本變成事實了後，台北已經開始leh混亂，si-ke thai-人放火，chit種情形促使一寡台北市民顛倒ng-bang日軍etang khah早入城；於是in iong-thok辜顯榮(現辜振甫in lau-pe)去引導日軍入台北城，to anne伊日後一生long ham日本人合作，甚至koh得tioh日本天皇選為貴族院議員。

以上，是辜家反駁人罵辜顯榮為「台奸」的說詞...。

咱koh來講，kang時期台南ma發生類似的代誌，當日軍落南beh進入台南城chin-cheng，城內ma是亂糟糟，於是一寡市民to拜托傳教士巴克禮去chhoa日軍進城...。

就頂面2件代誌來看是真sio-kang-e，但是為啥物kantaN聽人罵辜顯榮為「台奸」，soah無聽人罵巴克禮牧師是「台奸」？

原來構成「台奸」的要件並毋是單一chhoa日軍入城，而是看伊的日後、伊的一生，究竟是teh謀取私利iah是為大眾設想。

咱講日本統治台灣以後，由於台灣一寡地方頭人像林獻堂、蔣渭水等起來領導抗日，in辨刊物、辨演講、組「台灣文化協會」、鼓吹台灣人思想、爭取台灣人利益....。日本人當然看be過，於是 “寧作太平犬，莫作亂世人” 的辜狗目周真lai，組「公益會」、「有力者大會」來打擊台灣人、犧牲台灣人的利益來換取伊個人的私利。

Chit-khoan情形看在咱台灣人的眼中，當然真憤慨，莫怪有人寫詩來phiNsiuN伊：「辜顯榮比顏智(甘地)，蕃薯簽比魚刺，破尿壺比玉器」！

咱若beh探討日本統治台灣50冬的功kap過，咱to必需ai清楚in統治的本質kap手段，chai-iaN in所作所為對日後的台灣的影響，甚至必需要的時，ma應該ham kang時期日本統治下的朝鮮kap後來國民黨統治下的台灣來做比較。

日本統治台灣的長遠目標是將台灣當作in日本內地的延長，iah to是lou-boe beh將台灣民族徹底「同化」做大和民族的一員。但是，講bong講，做的sichun卻是差別待遇：

一、經濟方面：日本本國為避免因為治理台灣而有財政支出，特訂特別會計制度。Iah to是一切統治台灣需要的開銷ai由台灣方面ka-ti出，但是當台灣有「盈餘」的sichun卻是ai繳tng去本國。而且實施土地kap林野調查；土地調查除了整理hong am-kham起來的田園(thang增加稅收)之外，主要在確定土地所有權，以引進日本資本家的投資，並藉林野調查進一步將民有林地變做官有地，soa來chiah發展台灣的產業(製糖為重心)。俗語講：「第一憨，種甘蔗乎會社磅」；原來台灣的糖業不但是日本人攏斷，而且會社tiaN-tiaN會ti稱重的甘蔗頂頭做腳手，造成糾紛不斷。總之，雖然日本的目的是剝削台灣的經濟利益，但一方面soah替台灣的資本主義化奠立基礎。

二、政治方面：制定「六三法」賦與台灣總督有相當大的「立法權」；並動用「警察政治」，不但每台灣人配置的警察數比kang時期的日本kap朝鮮che，而且俗語講「關29 kang」，iah to是hit當時的「大人」(警察)esai免經司法程序便有權裁決拘留29 kang...。

三、教育方面：不准有本地思想，不得讀政治、法律、思想等人文學科，kantaN etang讀醫、農、商等技術層次。而且實施差別教育，台灣人上「公學校」，日本人上「小學校」。To算1922年以後中學以上改採共學制，ma因為台灣人的母語是台語，而日本人自se-han to講日本話，加上出題是根據小學校的水準，造成日本人顛倒khah優勢。

四、文化方面：雖然日本是外來者，但是因為in是採取「生物學」的統治方式，所以in進行台灣舊慣調查，將台灣的風俗民情一一調查整理，甚至koh整理台語，出「日台大辭典」、「台日大辭典」等10 goa本相關語典，要求官員、警察ai學習台灣話...。假使這ham後來 “自稱” 是「同胞」，soah m-bat為台語出過任何一本冊，顛倒打壓台灣人的母語的中國外來政權比較，「光復」對咱來講有啥意義leh？

一直到1937年為因應中日戰爭的需要，於是實施「皇民化運動」，而其政策首重日語之普及kap習俗之日本化。於是禁止報紙的漢文欄、實施「國語」家庭、改日本姓、進行寺廟「整理」、強制參拜神社...。

亞細亞的孤兒啊！Ti日本人的眼中你曾經流tioh支那的血；在中國看來你不過是受tioh皇民化，隨時會幫日本phah中國的狗奴才；孤兒啊！你kam一定ai ti chit 2 e中間做選擇，你kam無法度hoah出你是勇敢的台灣人？

台灣人的抗日運動大概esai分做武力抵抗kap後期的政治、文化抗爭。前期ui台灣民主國保衛戰到1915年的西來庵事件，後期ui 1914年「台灣同化會」成立到日本戰敗。

為啥物會有前後期武力、政治之分呢？一方面是武力抵抗到taN ma已經有20冬a，真明顯的是面對日本現代化的軍隊，根本是「鴨卵khian chiuN山--看破」；另方面，ui 1895年以後接受tioh新式教育、新思潮的少年輩tu-ho ui chit-cham開始出頭，於是in開始想khang想phang，組同化會、文化協會、chhong台灣議會設置請願運動等等，ui文化的、政治的層次落手。

俗語講：「做雞tioh chheng，做人tioh ai peng」。做雞m-chheng，to會iau腹肚；做人m-peng是會hong「軟土深掘」、「侵門踏戶」。台灣同化會的成立便是台灣人意識tioh ai ui政治方面落手的開始...。

台灣同化會主要由日本明治維新元老--板垣退助所倡導成立，伊的目的在：一、疏通總督kap島民的意見。二、提高島民的人權，使島民kap內地人地位平等享受同等待遇。雖然同化會是建立ti「台灣既然是日本的一部份，便無應該有差別待遇」，間接之下是承認日本對台灣統治的合法性；但是台灣人民並無顧慮chiah che，in phah-sng利用「同化」的名義進行「政治平等」的訴求。於是ti 1914年12月正式成立，soah ti 1915年2月便遭受解散。

Kap真che殖民地kang-khoan，反外來統治的怒火long是ui國外燒入本地。Ti東京的台灣留學生有一個「高砂青年會」的組織，in平時kantaN從事一寡聯誼kap文化活動。第一次世界大戰結束，「民族自決」燒遍全世界，ti 1919年在朝鮮發生朝鮮人要求獨立的「三一獨立萬歲事件」。勇敢的朝鮮人感動了台灣的留學生，lou-boe組「新民會」正式從事政治活動。

勇敢的台灣人終於踏出新時代的腳步，「新民會」的怒火真緊燒遍全台灣，引起「台灣議會請願」運動kap台灣文化協會的誕生...。

20年代是台灣史上的新時代，ma是台灣脫離中國建立主体性台灣新文化的宣告。1921年台灣文化協會成立，隨後新劇的出現、台灣新文學的誕生、第一首台灣創作歌「桃花泣血記」的流行...。

新時代的來臨，ma引進世界各國學說思潮，社會主義、共產主義、無政府主義、民族主義...long有人teh研究討論。思想的無kang便會造成抗爭路線的差異，這ma是造成日後台灣文化協會分裂的主因。

文協分裂後，ti 1927年由舊幹部成立了台灣史上第一個政黨--台灣民眾黨，台灣的抗日也演變為多路線的抗爭...。

日據時代因為台灣ham中國的政治、文化分離，致使真che從事反抗、民族運動的先輩真chio有中國經驗，對中國的認識無夠，造成普遍存有對中國的莫名的好感，誤認只有oa靠 “祖國” 台灣chiah有出頭天的chit-kang...。

1945年日本戰敗，日本放棄對台灣的主權，中國國民黨暫代盟軍佔領台灣。

中國的軍隊來囉！一個一個穿tioh草鞋仔，phaiN tioh鼎、鍋仔，lok-song lok-song to來「接收」台灣...。

Chit-e時期，國民黨為應付中國的內戰，於是一隻一隻的船，一直將台灣的米糧送tng去中國，親像清朝時代的「台運」，將台灣的資源送tng去中國內地。中國的sengli人ma紛紛走來台灣囤積糧食，賺黑心肝錢...。

1945年截止，台灣人的平均教育比中國khah koan，生活水準ma比中國khah富裕；但是ti he中國來的政權目中，台灣是受「異民族洗腦過的狗奴才」，於是伊將日本出兵中國的氣發洩ti台灣人的身軀頂；搶啦、騙啦、拐啦、強姦cha-bou啦！A-li-put-tat，無所不至...。台灣人的憤怒kap失望開始升高。

1947年，因為查緝私煙，爆發了台灣人ham中國人之間的大衝突--228事件。表面上是私煙查緝的衝突，實際卻是因為經濟的剝削，政治的攏斷(外省人主掌一切主管地位)、文化的差異，造成歷史的必然！

一發生，全台做=chit-e peng過來。「Phah阿山仔」、「中國豬仔死tng去」；一時間，台灣人的「祖國夢」醒a！亞細亞的孤兒chengsin囉！

台灣人提出32條政治要求，要求政治革新，要求台灣人自治。這已經是真軟性的要求，但是台灣行政長官陳儀竟然chhin-chhai應付，假好衰講無問題，暗中聯絡中國的21師步隊，等軍隊一上岸便改口，「小人phi」、對民眾開槍，「人掠、厝拆、雞仔鳥仔掠kah無半隻」，見tioh cha-bou to強姦，見tioh台灣人to開槍，而且用an-線鑽過人的手骨，將掠tioh的台灣人綁kui-koaN，chiah tan落海...。

台灣人憤怒囉！天真的台灣人ng-bang “祖國” 的疼痛，竟然是得tioh chit-khoan e下場，台灣人anchoaN毋憤怒！anchoaN毋生氣？於是勇敢的台灣人組成27部隊，對抗「乞食趕廟公」的中國政權...。

從此以後，台灣人覺醒tioh，只有建立以四大族群為基礎的台灣共和國，chiah有法度增進咱台灣的最大幸福建立咱台灣的東方瑞士國。

台灣的住民按時間先後為原住民、Holo、Hakka、kap所謂的「外省人」(新住民)。

1945年以後統治台灣的中國政權，真明顯是由「外省人」所攏斷。但是ma有一部份hong摒棄排除在統治者之外，流落在街頭巷尾，自力維生的「榮民」。Chia真緊變成台灣人的一部份，因為in kang-khoan遭受中國政治結構的剝削kap為害...。

90年代國會已經全面改選，中國政治結構成員ma ui「外省人」轉移到「買辦台灣人」的手中，但是這並無代表「台灣人已經出頭天」，因為伊iau維持「五權憲法」、「中華民國」chit-chiong過時的大中國的體制。

而且ti台灣建國以後，對於極少部份毋認同台灣堅持beh做中國人的，咱ma乎伊選擇的權利，甚至允准伊以「華僑」的身份tiam台灣永久居留。

咱台灣人結合新住民，結合所有認同台灣的新台灣人，做伙為建立東方瑞士--台灣共和國來打拼。

（部份連載ti「阿公店月刊」，全文原載「台灣囡仔」創刊號 11/1994）